قلبى موجوع على الإسماعيلى والمليونيرات سبب غرقنا فى الديونأنا شاهد عيان على براءة الأهلى من شائعة رفض استضافة الإسماعيلى أيام التهجير منجم المواهب ومصنع الناشئين هيقفل بسبب “شروة الصفقات الكسر”الأهلى لم يخطف نجوم الإسماعيلى.. إحنا اللى رافعين شعار لازم نبيع موقف الأهلى مع رمضان صبحى “وقفة رجالة” وكلنا بندعيله ماييلى بيعجبنى وكل مباراة بيسيب بصمة مع بيراميدز
هو واحد من أفراد الجيل الذهبى للنادى الإسماعيلى خلال فترة الستينيات والسبعينيات، الذين صالوا وجالوا بقميص الدراويش، سطر تاريخًا ذهبيًا لنفسه ولناديه على مدار سنوات طويلة من العطاء، كان مهاجمًا فذًا يعرف الطريق إلى المرمى من خلال أسهل وأسرع الطرق، تميز بقدرات تهديفية خارقة خاصةً على مستوى التسجيل بضربات الرأس التى اشتهر بإمطار شباك المنافسين بها، كان إحدى الركائز والعناصر الأساسية فى صفوف منتخب مصر على مدار عدة سنوات قاد خلالها خط هجوم الفراعنة ممثلًا ثنائيًا خطيرًا مع الراحل حسن الشاذلى نجم الترسانة. لقبته جماهير المستديرة بـ«فاكهة» الكرة المصرية، لما يتمتع به من مهارات فائقة الجودة وقدرات فنية تمتع العين وتنتزع الاّهات من قلوب العاشقين للعبة، هو النجم على أبو جريشة الذى احتفل بعيد ميلاده الـ78، لا سيما أنه من مواليد 29 نوفمبر1947 بالإسماعيلية.
“اليوم السابع” يحاور على أبو جريشة بمناسبة عيد ميلاده احتفالا برحلته الذهبية مع الكرة المصرية سواء بقميص الاسماعيلى أو منتخب مصر وإلى التفاصيل:
-ايه هي أغلى مباراة فى تاريخك؟
طبعا مباراة الإسماعيلى مع مازيمبي الكونغولي “الإنجلبير” فى 1970 لما كسبنا بطولة أفريقيا وكنا أول فريق يفوز باللقب.. المباراة دى حطت الإسماعيلة فى حتة تانية وعملت لينا سيط كبير فى أفريقيا.
– ايه هو أغلى هدف فى مشوارك؟
لما لاعبنا الاهلى سنة 67 وسجلت هدف حسم بطولة الدوري.
– مين أفضل لاعب زاملته فى رحلتك؟
لعبت مع ثلاثة أجيال مختلفة وحقيقى كان معايا لاعيبة جامدين أوي مش عايز اختار حد وأسيب حد عشان مظلمش أساطير كتير.
-ايه أصعب موقف مريت بيك فى الملاعب ؟
نكسة 1967 أنهت على جيل كامل، وقررنا الرحيل عن الإسماعيلية، ووقتها نادي الزمالك استضافنا، وكانت إقامة كاملة في نادي الزمالك بعد نكسة 67، وقتها قرر عثمان أحمد عثمان رئيس الإسماعيلي أن يؤدي فريق الإسماعيلي مباريات خارجية لمساعدة الجيش والمجهود الحربي بس كانت فترة صعبة أوي.
-ليه البعض بيتهم الأهلى أنه رفض استضافة الإسماعيلى وقت النكسة والتهجير؟
دى شهادة منى للتاريخ الكلام دا محصلش أبدا وكنت شاهد عيان وشوفت بعينى أن دا محصلش.
-طب ليه الشائعات دي دايما تطارد الأهلى فى علاقته مع الإسماعيلى؟
معرفش ليه بس الأكيد إن الأهلى معملش كدا وشهادتى مش مجاملة.. أكيد فى ناس ليها مصلحة توقع بين الأهلى والإسماعيلى، مع أن العلاقة حالياً مفيهاش أي توتر والأمور ماشية كويس.
-البعض بيقول الأهلى ليه دور فى أزمات الإسماعيلى لما خد أكثر من لاعب من قلعة الدراويش ايه ردك ؟
الاهلى مالوش دور فى أزمات الاسماعيلى..الاسماعيلى كان عارض اللاعيبة دى للبيع ولو الاهلى مكنش اشتراهم كان أي نادى تانى هيشتريهم ..لأن مبدأ البيع كان موجود عند الاسماعيلى إذن مش ذنب الاهلى انك مش قادر تحافظ على لاعبتك وتديهم فلوس عشان ميمشوش من النادى..لو ظروفنا كويسة مكناش هنبيع لاعيبة .
– بتحس ايه لما بتشوف الاسماعيلى فى الاوضاع دي ؟
إحنا في الإسماعيلي متعودين على الأزمات، ودي مش أول مرة، لكن دايمًا كنا بنرجع لأن روح الإسماعيلي مختلفة، واللي بيحب النادي عمره ما بيسيبه..ودايما عندنا البطل الحقيقى هو الجمهور..الإسماعيلي هو مصنع لاعيبة منتخب مصر، بس بالوضع الحالي المصنع هيتقفل، مش متخيل إن منتخب مصر مفيهوش ولا لاعب من الإسماعيلي.. ده عمره ما حصل قبل كده
– مين سبب أزمات الاسماعيلى ؟
إدارات الإسماعيلي في السنوات الأخيرة كانت بتشتغل لمصالحها الشخصية، مش لمصلحة النادي، والإسماعيلي هو اللي بيدفع الثمن، النادي محتاج إدارة تحب الكيان بجد وتفكر للمستقبل، مش للمنصب كمان قصة غياب التخطيط والاستقرار الإداري هو السبب في كل اللي وصلنا له، والمشكلة إن اللي بيجي يمسك النادي مش بيكمل أو بيبدأ من الصفر تاني
– تقصد مين بإدارات الاسماعيلى ؟
مجلس يحيى الكومي كان سببًا رئيسيًا في أزمات الإسماعيلي النادى مديون بسببهم مشيوا وسابوا النادى غرقان فى الديون، قرارات غير مدروسة وعدم وجود رؤية واضحة والتعاقد مع عدد كبير من اللاعبين والنتيجة طبيعية، فريق بيعاني، وقلوبنا موجوعه عليه ، ومش هقدر كمان أخفى دور المهندس إبراهيم عثمان رئيس الاسماعيلى الاسبق فرغم أنه فى عهده فاز الدراويش بالكأس والدورى، وحقق إنجازات على الصعيدين العربى والإفريقى، ولكن غلطة الشاطر بألف.
مشكلة إبراهيم حسن لاعب نادى النجوم، كانت فى عهد المهندس إبراهيم عثمان، وتركها تتفاقم حتى تسببت فى إيقاف الإسماعيلى وخصم نقاط منه وتغريمه ماليًا ، وهذه الغرامة الكبيرة وديون مجلس الكومى هى التى تسببت فى تفاقم أزمة القلعة الصفراء.
-قولت قبل كدا انك اتكلمت مع يحيى الكومى فى الازمة دي قولتله ايه وايه كان رده ؟
قولتله يا بشمهندس، إنت بتتعاقد كل يوم مع لاعبين بأرقام كبيرة، والإسماعيلى لا يملك القدرة على سداد مستحقات اللاعبين، فهل ستتحمل أنت من جيبك الخاص تعاقدات اللاعبين أم سيتحملها النادى ويغرق فى الديون ، ومردش عليا هو بس كمل شراء للاعيبه لحد مابقينا ضيف دائم فى الفيفا
-الاسماعيلى فتح باب التبرعات لحل أزمة القيد ..المجالس دى ساهمت واتبرعت ؟
المليونيرات معندهمش نخوة ..الغلابة هما اللى بيتبرعوا ..دول مش عايزين يساهموا مع أنهم هما اللى عملوا الازمة دى لما اشتروا لاعيبة ملهاش لازمة ومع ذلك مدفعوش مستحقاتهم .
-تفتكر كل نجوم الاسماعيلى اللى لعبوا للدراويش لازم يتبرعوا ؟
لأ مش لازم ..نجوم الاسماعيلى مش ملزمين بحل الازمة والمجلس الجديد ماشى كويس وبياخد خطوات لحل الموقف قبل يناير.
-الاسماعيلى هيقدر يقعد فى الدوري الموسم دا ولا صعب ؟
الاسماعيلى لو حل أزمة إيقاف القيد هيقعد فى لاعيبة صغيرة وجهاز فنى بيشتغل من غير فلوس وجمهور بيساند من قلبه وعندنا إصابات كتير.
-شوفت ازاي قرار الاهلى بمساندة رمضان صبحى فى أزمته ؟
موقف جميل مش غريب على الاهلى حسيتها وقفة رجالة فى وقتها..الولد فى محنة وكل الرياضيين متعاطفين مع رمضان صبحى وبندعيله تعدى بخير.
-منتخب مصر هيعمل أزمة فى كأس الامم الافريقية ؟
لازم الناس تقف مع المنتخب فى البداية ونساند حسام حسن ..أمم افريقيا خارج التوقعات عالطول كاب فيردي صعدت كأس العالم ياجماعة..وطول عمر المنتخب مرشح للتتويج باللقب لاننا البطل الحقيقى لأفريقيا.
-طب فرص منتخب مصر الثانى فى كأس العرب ايه ؟
زرت تمرين منتخب مصر وشوفت حماس وإصرار كبير للاعبين وحلمى طولان عامل شغل كويس باذن الله يعملوا حاجة فى البطولة.\
-مين اللاعب اللى لفت نظرك فى الكرة المصرية السنوات الاخيرة ؟
ماييلى مهاجم بيراميدز لاعيب كويس وانسجم خلاص مع الكرة المصرية وليه بصمته فى أي مباراة يلعبها .
نقلاً عن : اليوم السابع